УЕФА вовдува „данок на луксуз“ за богатите клубови

Претседателот на УЕФА, Александар Чеферин изјави дека е потребно да се прекине практиката богатите клубови да ги купуваат најдобрите фудбалери.

Според зборовите на Словенецот, враќањето на балансот и конкуренцијата во европскиот клупски фудбал е примарна задача за време на неговиот мандат.

Чеферин додаде дека започнува дискусија за запирање на финансиските злоупотреби во фудбалот, лимит на платите на играчите, како и за лимитирање на провизиите кои ги добиваат фудбалските агенти.

Во УЕФА размислуваат и за воведување на данок на луксуз, според кој клубовите ќе плаќаат казни при пречекорување на определен буџет за фонд за плати, а примените средства ќе бидат прераспределени по социјални програми.

„Може да воведеме данок на луксуз, може да ги ограничиме кредитите и бројот на пријавените фудбалери во клубовите. Ќе разговараме за сите овие мерки на овогодинешниот состанок на Советот за професионални стратегии кон УЕФА“, изјави Чеферин.