Ни Јуве, ни Интер – Патрик Шик заврши во Рома

Конечно заврши трансфер сагата за играчот на Сампдорија Патрик Шик. Напаѓачот од следната сезона ќе игра во Рома за трансфер вреден 38 милиони евра.

Шик блесна минатата сезона во Серија А и го привлече вниманието на скоро сите големи клубови во Италија. Најбрз беше Јувентус кој го договори трансферот, но напаѓачот не успеа да ги помине медицинските прегледи.

Откако пропадна трансферот во „старата дама“, Интер важеше како најсериозен кандидат за неговиот потпис, но во последен момент Рома испрати понуда која „нероаѕурите“ не можеа да ја израмнат.

Имено, „волчицата“ постигна договор со Самдорија за едногодишна позајмица од 3 милиони евра, а следното лето ќе го откупи договорот за додатни 35 милиони евра.

Вечерва Шик треба да пристигне во Рим и доколку биде се во ред со лекарските прегледи и официјално ќе стане нов член на Рома.