Наскоро простување какво што заслужува – Снајдер повеќе нема да игра за Холандија

Холандскиот ветеран кажа „доста“ после 15 години поминати во националниот дрес.

Весли Снајдер (33) одлучи да ја заврши својата репрезентативна кариера.

Момчето од Утрехт оваа одлука му ја соопшти на тренерот Роналд Куман при посетата на искусниот стручњак каде што поранешниот плејмејкер на Интер и Галатасарај во овој момент настапува.

Куман и Снајдер разговрале за иднината и искусниот играч за врска се сложил со мислењето на селекторот дека е време да го отстапи местото на помладите.

„Весли е еден од најдобрите холандски фудбалери во последната деценија. Голем играч со големи успеси. Но, сакам да селектирам поинаков тим, да им дадам шанса на помладите и да направам нова селекција“, изјави Куман.

Снајдер 15 години го носеше дресот на Холандија. Дебитираше во 2003 година во пријателскиот натпревар против Португалија, а минатиот ноември го одигра 133 натпревар за оваа селекција против Романија.

Со Холандија Снајдер беше вицешампион на светот во 2010 година и третопласиран на Мундијалот во Бразил пред четири години.

Според информациите од Фудбалскиот сојуз на Холандија  наскоро ќе биде организиран и проштален натпревар за ветеранот.