Мурињо се пошегува со Лукаку – Откри што му е потребно за да започне да постигнува голови

Тренерот на Манчестер Јунајтед, Жозе Мурињо се пошегува на сметка на Ромелу Лукаку откако Белгијанецот и вчера не се запиша во листата на стрелците.

По одличниот старт на сезоната, каде што на седум лигашки натпревари постигна исто толку голови, Лукаку западна во голгетерска криза и на последните седум натпревари во Премиер лигата има постигнато само еден гол и тоа против Њукасл (4:1). По синоќешната победа над Вотфорд (4:2), Мурињо на прес-конференцијата беше прашан за лошата форма во која се наоѓа неговиот напаѓач, а тренерот на Јунајтед даде и интересен одговор.

„Мислам дека Лукаку треба да пронајде некој спонзор со кого ќе потпише голем договор. Како што знаете, во моментов го нема и игра во нормални, црни копачки. Би било добро некоја компанија да му подари вистински копачки и да му плати убава сума. Кога ќе најде спонзор, ќе започне и да постигнува голови. Во моментов е на чекање“, на шега изјави Мурињо, кој потоа стана сериозен:

„На Лукаку не му вршам притисок и не ми паѓа на памет да го критикувам поради шансите кои ги пропушти. Тој е голем професионалец и одличен колега, не можете да не бидете задоволни со него“.

Додека го чека новиот спонзор, Лукаку носи црни копачки од Најк со прецртано лого од оваа американска спортска компанија.