Лукаку: Бројот девет го побарав од Ибрахимовиќ

Манчестер Јунајтед денес и официјално потврди дека Ромелу Лукаку е нов фудбалер на екипата.

Лукаку по четири сезони минати во Евертон одлучи да го промени клубот и кариерата да ја продолжи на „Олд Трафорд“ иако се зборуваше дека големи се шансите да се врати во Челси. Меѓутоа, Белгиецот смета дека пристигнал во најдобриот клуб на светот и едноставно не можел да го одбие позивот на Жозе Мурињо.

Новиот напаѓач на „Црвените ѓаволи“ веќе го избра бројот кој ќе го носи на дресот на Јунајтед, а во прашање е деветката. Познато е дека минатата година овој број го носеше Златан Ибрахимовиќ, па Лукаку од шведскиот напаѓач побарал одобрение да го земе овој број.

„Го прашав за деветката бидејќи сум напаѓач и тоа е нивен број. Убав број е и признавам дека барав одобрение од Златан за тој број. Сакам да му се заблагодарам што ми дозволи да го носам тој број на грбот“, истакна Лукаку.