Конте кажа ДА – Италијанецот го презема Милан

Италијанските медиуми со сигурност тврдат дека Антонио Конте ќе биде новиот кормилар на Милан и неговото назначување е само прашање на време.

Најеминентните италијански весници „Газета дело Спорт“ „Кориере дело Спорт“ и „Тутоспорт“ пренесуваат дека Конте веќе му кажал ДА на Милан и ќе биде заменик за Џенаро Гатузо на „Сан Сиро“.

Новите сопственици комплетно го променија раководството на клубот, а со тоа и плановите, па нивна желба е на клупата да донесат тренер од светска класа.

Новиот директор Леонардо веќе ги договорил деталите со Конте за кого е спремен 4-годишен договор тежок 6,5 милиони евра по сезона.

Конте во моментов е во преговори со Челзи за раскинување на договорот откако неодамна доби отказ. Во Милан чекаат двете страни да постигнат договор околу бонусот кој треба да го добие Италијанецот, а потоа го чека столчето на „Сан Сиро“.