Класика без Моцарт и Бетовен: Кој ќе биде новиот „маестро“!?

Иако денес ширум Европа се играат многу дерби натпревари, сепак сите очи се вперени во шпанското „Ел Класико“ кое веќе со години го има епитетот на најголем фудбалски спектакл.

Двата шпански гиганти денес ќе ги одмерат силите на „Камп Ноу“, а овој меч може да се покаже како клучен за судбината на двајцата тренери. Лопетеги едвај го дочека Класикото и при неуспех не му бега отказ, додека Валверде е посигурен, но секој пораз од Реал предизвикува „земјотрес“ во Каталонија.

Каква е таа „класика“ без Моцарт и Бетовен!?

Вечерашниот спектакл ќе биде осиромашен, бидејќи после повеќе од една деценија „Ел Класико“ ќе биде без двајцата најдобри фудбалери на денешницата Лео Меси и Кристиано Роналдо.

Аргентинецот пред една недела доживеа повреда на левата рака, додека Португалецот ова лето без поздрав си замина од „Сантиаго Бернабеу“. Тоа ќе даде простор на површина да испливаат нови херои. Се очекува улогата на „маестро“ во ова Класико да ја има некој помеѓу Кутињо и Герет Бејл. Фаворитот за „Златната топка“ Лука Модриќ и уригвајстака гол-машина Луис Суарез исто така ќе бидат во центарот на вниманието.

Валверде има проблеми, Лопетеги дилеми

Тренерот на домаќините Ернесто Валверде има сериозни проблеми со повредени фудбалери, особено во дефанзивата. Тој ќе биде приморан на теренот да истрча со тандемот Пике – Ленгле кои се единствените здрави стопери во тимот. Голем знак прашалник кај Каталонците е десната бековска позиција, па Валверде треба да одлучи дали ќе започне со Семедо или Сержи Роберто. Исто така се очекува Артур повторно да биде во стартниот тим после неколкуте брилјантни партии.

Главната дилема пред Лопетеги е формацијата: 4-3-3 или 4-4-2. Баскискиот стратег се двоуми дали да започне со вообичаеното трип Бејл, Бензема, Асенсио, или пак да ја промени формацијата поради неговиот „миленик“ Иско. Голем хендикеп за кралевите ќе биде отсуството на Карвахал, па останува на Лопетеги да одлучи дали ќе го замени со Начо или со новото засиливање Одриазола.

Веројатни состави:

Барселона: Тер Штеген, Семедо, Пике, Ленгле, Алба, Ракитиќ, Бускетс, Артур, Дембеле, Кутињо, Суарез.

Реал Мадрид: Куртоа, Начо, Варан, Рамос, Марсело, Модриќ, Каземиро, Крос, Бејл, Бензема, Асенсио/Иско.

Целиот текст прочитајте го на специјализираниот портал kladenje.mk