Иднината на Дешам не е сигурна, се огласи првиот човек на францускиот фудбалски сојуз

На Европското првенство пристигнаа како најголеми фаворити, но Французите настапот го завршија во осминафиналето.

Во осминафиналето Швајцарија ги елиминираше после пенал серијата и сега се бара виновникот за разочарувањето. На удар на критики сосема очекувано се најде Дидиер Дешам, а во Франција се води расправа за неговиот статус.

Веќе се шпекулира со имињата за негов наследник, а на оваа тема зборуваше и првиот човек на Фудбалскиот сојуз на Франција, Ноел Ле Грат.

„Дидиер мора да размисли како и јас. Ќе се најдеме некаде надвор од канцеларија, ќе поминеме еден ден заедно и ќе сфатиме кој што сака“, изјави првиот човек на францускиот фудбал.

Ле Грат сака да знае дали Дешам е мотивиран да продолжи.

„Зборуваме за човек кој ни донесе многу радост и не одведе до победа на Светското првенство во 2018 година. Ќе чекаме, ќе разговараме со него за Европското првенство. Сакам да знам како се чувствува и дали е мотивиран. Истото важи и за мене“, порача Ле Грат.