Играчите на Борец застанаа зад Анѓушев: Не стојте на патот на нашиот успешен проект!

Откако Кочо Анѓушев најави дека би можел да го напушти Борец следуваа бројни негодувања, прво реагираа „Гемиџиите“, а сега се огласија и фудбалерите.

Фудбалерите на македонскиот прволигаш застанаа зад првиот човек и го посочија Анѓушев како човек кој е заслужен за успесите на клубот во последните години.

Соопштението од фудбалерите ви го пренесуваме во целост:

“Деновиве сме сведоци на разни теми и случувања околу Нашиот клуб. Ние како играчи во клубот максимално стоиме и го поддржуваме нашиот претседател во сите одлуки. Воедно, упатуваме апел да не се стои на патот на успешниот проект кој ќе носи многу успех и радости во Велес и спортот, а секако најголем „виновник“ е компанијата Брако, која што има финансиска моќ за Борец да биде тоа што е денес. Ние како професионалци нашите обврски ги исполнуваме во целост и се подготвуваме за првенството во кое очекуваме голем заеднички успех на ФК Борец, градот Велес и секако нашиот дванаесетти играч, навивачката група „Гемиџии“ која што дава максимална поддршка до нас и сопственикот на клубот. Целата ситуација не загрижува нас играчите, сите работници во клубот и навивачите. Се надеваме дека проблемот ќе биде решен во најкраток период и нема да останеме на цедило. За доброто на Велес, на ФК Борец и спортот. Велес е Борец, Борец е Велес“.