Гвардиола: Манчестер Сити во споредба со Барса е нула!

Откако седна на клупата на Манчестер Сити, Пеп Гвардиола се соочува со константно споредување со Барселона.

Логично, Каталонецот е еден од најуспешните тренери во историјата на Барселона, а овој Сити полека но сигурно истакнува кандидатура за големи достигнување, не само во Англија туку и во Европа.

Лига купот веќе е освоен, Премиер лигата многу веројатно дека е нивна, па преостанува само Лигата на шампионите каде што конкуренцијата е најсилна. „Граѓаните“ утре го играат реваншот против Базел, откако во првиот натпревар славеа победа со 4:0.

Пеп на конференцијата за медиуми доби конкретно прашање дали Сити и Барселона се на исто ниво.

„Не. Играчите се поинакви, тие имаат фудбалери кои во минатото освојуваа многу трофеи. Ние сме нула. Поголемиот дел во Манчестер“, потенцираше Пеп.

„Можеме да кажеме дека сме освоиле еден трофеј до сега, не можеме да се споредуваме со Барса. Таквата споредба не е добра. Барса е клуб кој доминираше во изминатата декада, 15-20 години со различни тренери и играчи. Секоја година освојуваа по некој трофеј, а ние минатата недела го освоивме првиот. За да се доближиме до нивото на таков клуб, мораме да освојуваме трофеи неколку години, долг временски период. Тоа е единствената формула“, изјави Гвардиола.

Потоа Гвардиола зборуваше за Премиер лигата.

„Блиску сме и математички да ја освоиме Премиер лигата. Нема да бидам дволичен да тврдам дека ништо не е готово. Секако дека е готово, потребни ни се уште четири победи. Мораме да бидеме мирни“, заврши Каталонецот.