Во ПЛ одлучиле: Наскоро ќе биде објавено дека сезоната е завршена!?

Директорот на Удинезе Пјерпаоло Марино тврди дека веќе е донесена одлука за завршување на сезоната во Премиер лигата.

Вакво нешто се случи веќе во Белгија која објави крај на првенството и го прогласи Клуб Бриж за шампион. УЕФА се спротистави на ова и порача дека приоритет е сезоната да се заврши, дури Чеферин им се закани дека може да немаат претставници во Европа.

Сепак, овој пример на Белгија може да го следи Англија. Пјерпаоло Марино кој е претседател на Удинезе соопшти дека наскоро Премиер лигата ќе објави дека сезоната е завршена.

Тој не откри од каде му се таквите информации, но Удинезе и Вотфорд имаат ист сопственик (семејството Поцо) и се во блиска соработка.

„Белгија веќе го заврши шампионатот и покрај заканите за санкции од УЕФА. Во Англија, Премиер лигата наскоро ќе испрати слично соопштение затоа што ситуацијата таму е многу сериозна. Јас се надевам само дека повторно ќе уживаме во фудбалот после пандемијата со коронавирусот. Не е важно колку време ќе ни треба, најважно е да излеземе како победници“.