Руни ја добива „десетката“ и станува најплатен во Евертон!

Вејн Руни најверојатно се враќа онаму каде што започна.

Капитенот на Манчестер Јунајтед во наредните денови и официјално ќе стане член на Евертон.

Утрово беше потврден трансферот на Ромелу Лукаку од Евертон во Манчестер Јунајтед, а дел од таа зделка би требало да биде и Вејн Руни.

Добро известениот „Liverpool echo“ тврди дека Вејн Руни постигнал договор со Евертон и ќе потпише договор на две години, а ќе биде и најплатен со плата од 150.000 фунти неделно, што е двојно помалку од она што го заработува во Манчестер. Покрај тоа Руни би требало да ја добие и „десетката“ која до сега му припаѓаше на Лукаку.

Руни како тинејџер одигра две сезони во првиот тим на Евертон и на 77 натпревари постигна 17 погодоци пред Сер Алекс да го доведе на „Олд Трафорд“. За „црвените ѓаволи“ тој одигра 559 натпревари и постигна 253 погодоци и стана најдобриот стрелец во историјата на клубот.