Рома испушти предност од два гола, Киево со бодот „Олимпико“ се уште во негатива (видео)

Екипите на Рома и Киево со натпреварот од 12:30 ја отворија неделната програма во италијанската Серија А.

Избраниците на Еусебио Ди Франческо иако имаа предност од 2:0 после првите 45 минути на крајот мораа да се задоволат само со бод.

Рома започна напаѓачки од самиот старт, а таквата игра им донесе резултат уште во 10-тата минута кога Ел Шарави постигна гол за предност од 1:0. Дваесетина минути подоцна новајлијата Кристанте после одличната асистенција на Џеко погодува за 2:0.

Киево и во првиот дел успеваше да создаде по некоја прилика, но на полувреме „волчицата“ однесе солидна предност.

После само седум минути игра во вториот дел Валтер Бирса со вистинско ремек-дело намали на 2:1.

„Студениот туш“ на „Олимпико“ стигна во финишот од средбата.

На седум минути пред крајот на натпреварот после една конфузна реакција на одбраната на „волчицата“ Степински успеа да погоди за 2:2.

После овој натпревар и четири одиграни кола во Серија Рома има учинок од осум освоени бодови , додека Киево поради казната која ја заработи е последен на табелата со негативно салдо од -1 бод.