Од непотребен до незаменлив: Бакајоко сака да остане во Милан!

Тиму Бакајоко даде опширно интервју за „Франс Фудбал“ во кои истакна дека е пресрекен во Милан и сака да остане на „Сан Сиро“.

Бакајоко објасни зошто го одбрал Милан, каков однос има со Гатузо и како останал импресиониран од Малдини.

Французинот имаше лоша прва сезона во Челзи иако пристигна како скапоцено засилување од Монако.

„Челзи одлучи да направи некои промени и јас не бев дел од нивните планови. Сари отворено ми кажа какви намери има. Сигурно би добил и јас шанса да ги покажам своите квалитети, но почувствував дека ми е потребна промена. Тоа беше важна одлука бидејќи Милан ми е четврти клуб, а имам само 24 години“, истакна Бакајоко.

„Ми се јави Леонардо и одлучив дека Милан е единствениот клуб каде што сакам да одам ако заминувам од Челзи. Како дете го обожавав овој клуб, а кога пристигнав ме пречека Малдини. Тој е икона на Милан и уште од првиот ден овде раборате каква институција е овој клуб“, додаде Французинот, кој на почетокот не пружаше солидни партии, па Гатузо отворено го критикуваше.

„Не ми се допаднаа неговите изјави. Тоа беа жестоки критики и го доведе во прашање мојот квалитет. Но Гатузо е таков, сака работите да ги каже во лице и онака како што се. Тој е татковска фигура во соблекувалната и сите фудбалери сакаат да имаат таков тренер. Со него разговараме за се и постојано застанува зад нас кога ќе погрешиме. Што се однесува до тактиката исто така е многу прецизен“, заклучи Бакајоко.

„Играм добра сезона и многу сум среќен во Милан. Знам дека сум под договор со Челзи, но јас сакам да останам во овој клуб. Мојот сон е да играм во Лигата на шампиони со Милан“.