Напнато во Баерн: Родригез освен со Ковач има проблеми и со раководството?

Баерн Минхен оваа сезона не е премногу убедлив.

Иако се очекуваше повторно да биде доминантен во првенство после 10 одиграни кола има 20 освоени бодови и се наоѓа на третото место со четири бода помалку во однос на Борусија Дортмунд која е лидер на табелата.

Навивачите не се задоволни и неколку пати бараа промена на тренерското столче, но раководството на клубот и понатаму му искажува поддршка на Нико Ковач.

Медиумите во Германија пишуваат дека Ковач има големи проблеми со одржувањето на дисциплината во тимот. Грбот му го свртија неколку фудбалери, помеѓу кои е и Хамес Родригез кој јавно го критикуваше Ковач.

Освен со Ковач, изгледа дека Родригез не е во најдобри односи и со Хасан Салихамиџиќ.

Дека ситуацијата во Баерн не се смирува потврдува и информацијата на „Билд“. Според пишувањето на германскиот медиум. Родригез после натпреварот во Мајц каде што Баерн пред десетина дена славеше со 2:1, одбил да се ракува со Салихамиџиќ кој се налутил поради таквата реакција на Колумбиецот.

„Грешиш…“, наводно Салихамиџиќ кратко му порачал на Родригез.

Родригез после тешките сезони во Реал се надеваше дека во Баерн ќе го прикаже најдоброто, но сега и тука се соочува со проблеми и игра се помалку.