Младост оди во историја, салата во Битола ќе се вика Боро Чурлевски

Спортската сала во Битола ќе го носи името на еден од битолските ракометни великани.

На денешната 16-та седница на Советот на Општина Битола, координаторот на советничката група на СДСМ, Методија Илиевски, предложи како точка на дневен ред да се стави и Иницијатива за промена на името на Спортската сала „Младост“ во „Боро Чурлевски“. Истата беше додадена во дневниот ред и едногласно усвоена од страна на битолските советници.

Битолската ракометна легенда, Боро Чурлевски, најголемите свои спортски успеси ги постигна токму во Спортската сала „Младост“. Ракометната кариера ја започна како иргач на „Пелистер“ во 1984, во златните години на тогашниот ракомет, кога „Пелистер“ беше три пати вицешампион на Југославија.
Кариерата ја заврши како тренер на РК „Прилеп“, а почина во 2014 година. Беше миленик на битолската публика, која на секој натпревар го скандираше неговото име.