Манчини: Роналдо оваа сезона во ЛШ не е добар како претходните години

Селекторот на Италија Роберто Манчини смета дека Кристиано Роналдо не игра во Лигата на шамионите како што тоа беше случај претходно.

Ќе потсетиме, Јувентус неодамна на „Ванда Метрополитано“ изгуби на гостински терен од Атлетико Мадрид со 2:0 во првиот натпревар од осминафиналето во Лигата на шампионите.

Кристиано Роналдо не направи многу во натпреварот против тимот кој додека беше член на Реал Мадрид и тоа како му „лежеше“.

Роберто Манчини сега даде свој коментар на оваа средба.

„Јуве – Атлетико? Јасно беше дека тоа ќе биде тежок натпревар. Не постои магична формула за пресврт, но Јувентус е искусен тим. Доволно е да се потсетиме дека минатата сезона беа блиску да го свртат резултатот во своја корист откако во првиот натпревар против Реал изгубија со 3:0“.

Следуваше коментар за човекој кој беше доведен за да се направи тој исчекор во Европа.

„Роналдо оваа сезона во Лигата на шампионите не е на нивото од претходните, но тој секогаш може да направи нешто големо. Во Серија А му оди добро, па според мене има солидна сезона“, изјави Манчини.

Јувентус во најелитното европско натпреварување сега го очекува реваншот против клубот од Мадрид и доколку „старата дама“ сака продолжување на европскиот сон ќе мора да ја надополни негативата од првата средба.