Време е за финале, Македонија на 90 минути од ЕП!

Конечно дојде толку очекуваното финале во Лигата на Нации. Македонската фудбалска репрезентација е на 90 минути до остварување на најголемиот успех во историјата на фудбалот, пласман на едно Европско првенство. Последна пречка пред остварување на големиот сон е Грузија која ќе не пречека во Тбилиси.

Двете селекции сакаат да испишат историја

Пред двете селекции е најважниот меч во историјата, но само една од селекциите таа историја ќе ја испише со златни букви. Двете селекции се познаваат добро и јас не очекувам некој големи изненадувања од тактички аспект. Никогаш двете селекции немаа играно меѓу себе до пред два месеци, од кога на два пати одиграа 1:1. На првиот меч во Грузија бевме надиграни во секој поглед и тој меч треба да ни биде поука како не треба да одиграме во ова големо финале. Македонија имаше само два удари кон противничкиот гол, а црвениот картон на Муслиу во 64-та минута, никако не смее да биде алиби за таа лоша игра.

Минатиот месец, Македонија беше подобра. И покрај водството на Грузија, македонија и со играч помалку даде гол во 93-та минута и покажа дека има големи шанси пред ова големо финале. На двата меча добивме црвен картон, но овој пат е добро тоа што во Тбилиси ќе има ВАР техннологија и судиските одлуки нема да бидат лесни за носење од прва рака.

Барди ќе фали, но Ангеловски има адути

Ангеловски веќе втор собир по ред се соочува со сериозни проблеми. Добро се снајдовме на минатиот дуел со Грузија, минатиот месец кога бевме без половина репрезентација, па поради тоа нашите проблеми не ги гледам како голема причини за евентуален пораз. Штета што нема да игра Барди. Со него во тимот, Македонија ќе имаше секако поголеми шанси но Ангеловски има одлични фудбалери во селекцијата кој можат да го заменат на достоен начин. Освен Барди, во Грузија не отпатуваа и Кире Ристевски и Крсте Велковски поради позитивен тест на Ковид-19. За Адеми не се знае сеуште ништо, но добри се најавите дека ќе може да одигра барем едно полувреме. Прашање е дали ќе стартува или ќе чека од клупата.

Јасно е дека Барди е главен играч во средината, но сега се враќа Елмас и токму тој би требало да ја пополни празнината во средината. Покрај него би требало да стартува Николов, како и Костадинов кој на минатиот натпревар со Грузија беше еден од најдобрите на теренот. За разлика од предходниот меч, сега одбраната ќе биде комплетна па таму ќе се најдат Муслиу, Велковски и Бејтулаи, а на бочните позиции во оваа 3-5-2 или 5-3-2 формација ќе стартуваат Алиоски лево и Ристовски десно. Покрај Пандев би требало да стартува Несторовски во нападот. Според ова, јасно е дрека средината ќе биде ослабена, ќе бидеме далеку послаби и по прекините кои се резервирани за Барди, но на вакви натпревари не смее да биде алиби ниту едно отсуство.

Вајс прави големи работи со Грузија

Владислав Вајс прави одлична работа со селекцијата на Грузија. Словакот кој ја водеше и својата земја немаше среќа во квалификациите за пласман на Европското Првенство, па и покрај добрите игри мораше да се задоволи со 4-то место во групата. Имаа две победи над Гибралтар и две ремија дома со Република Ирска и Данска, но против сите селекции одиграа на високо ниво. Предходно пак во Лигата на Нации беа први и минатиот месец одиграа одлично полуфинале против Белорусија. Јасно е дека нивната најголема предност ќе биде домашниот терен, особено што оваа селекција на последните 14 домашни натпревари има само еден пораз и тоа од Швајцарија со 0:2 во Март месец минатата година.

И Вајс со проблеми во составот

Голем проблем за Грузија е позицијата лев бек. Тие немаат вистинско решение за таа позиција, немаат квалитетен бек па во неколку наврати селекторот Вајс експериментираше. Најверојатно таа позиција ќе ја има Лаша Двали од Ференцварош кој игра како централен бек, но во репрезентацијата принудно е на левата позиција.

Чакветадзе е повреден и него воопшто го немаше во составот. Но најголемите проблеми во Грузија се случија после собирот. Имено, фудбалерот кој го постигна голот за Грузија на последниот меч со Македонија во Скопје (1:1), Хвича Кварацхелиа е позитивен на последното тестирање за Ковид-19, а поради истата причина мечот ќе го Леван Шенгелија, напаѓачот на турски Коњаспор.

Можна почетна постава на Грузија:

4-2-3-1 – Лорија; Какабадзе, Кашија, Квирквелија, Двали; Канкава, Квеквескири, Казаишвили, Окриашвили, Хвича; Качарава

Можна почетна постава на Македонија:

3-5-2 – Димитриевски; Бејтулаи, Велковски, Муслиу; Ристовски, Костадинов, Николов, Елмас, Алиоски; Пандев, Несторовски

Фото: ФФМ