Новоформираната регионална лига во билијард стартуваше со турнир во Скопје

Лабинот Маркај го освои првиот турнир од новоформираната регионална лига во билијард, што викендов се одржа во Скопје.

Играчот од Косово во финалето успеа да задржи високо ниво на сконцентрираност и покрај напорната агенда и многуте натпревари, со помалку грешки во финалето да слави со 9:4 против легендата на македонскиот билијард, Дејан Сипковски, првиот македонски државен првак во овој спорт. Финалето помеѓу Сипковски и Маркај беше многу по рамноправно отколку што е отсликано со конечниот резултат: двајцата играчи имаа едвај по неколку непрецизни удари, но младиот Маркај успеа да ја пронајде формулата за добро почетно разбивање на топките, што му даде клучна предност. Сипковски имаше најдобар учинок од нашите претставници, но на крајот и покрај неколкуте обиди за промена на пристапот во „разбивањето“ на топките, не успеа го најде својот ритам, ниту да ги искористи сите шанси при непрецизните удари на противникот.

На овој турнир играа 76 играчи, меѓу кои 30 од Македонија. По комплетирањето на натпреварите од прелиминарните кола се дојде до бројката од 32 натпреварувачи, од кои една третина, односно 11 беа домашни играчи. Во оваа фаза започнаа и објективно по квалитетните мечеви кои привлекоа големо внимание и реакции кај сите кои ги следеа. Младите Флорим Мемеди и Мирсад Зекири од Тетово остварија сигурни победи, а импресивна игра во оваа фаза покажа и нашиот Јасин Медиу кој ја комплетираше „четворката“ заедно со Сипковски што влегоа во завршницата со најдобрите 16 играчи. Едмонд Заја од Албанија во два наврати со тесен резултат славеше против нашите играчи (7:6 против Тале Самарџиоски, 9:8 против Флорим Мемеди), со што стигна до полуфиналето каде беше елиминиран од победникот Маркај (9:7).

Дејан Станковиќ (кој го елиминираше Медиу) беше трет и најдобро пласиран од играчите кои дојдоа од Србија, откако претходно Бојана Шарац тесно загуби со 9:8 од Амар Ѓушница од Косово, На крајот Ѓушница, а потоа и Станковиќ беа елиминирани од расположениот Сипковски. Во вкупно одиграните 33 партии во полуфиналето, сите играчи севкупно направија 3-4 грешки, што доволно говори за тоа со колку висок квалитет и интензитет се играше секој меч.