Навивачите на Ливерпул загрижени по изјавата на Зидан за Салах

Египетскиот фудбалер, Мухамед Салах игра неверојатна сезона во дресот на Ливерпул.

Овој одличен крилен напаѓач на „Енфилд“ пристигна минатото лето од Рома за „само“ 40 милиони евра, а многумина сметаат дека „Волчицата“ прелесно се откажа. Иако и во Рим играше одлично, Рома одлучи да го пушти за дефинтивно мали пари, а денеска сигурно Салах вреди многу повеќе.

Тој сега се поврзува со Реал Мадрид што неодамна го потврди и селекторот на репрезентацијата на Египет, а тренерот на „Кралевите“, Зинедин Зидан додаде бензин на огнот за навивачите на Ливерпул. Тој за странските медиуми пред финалниот натпревар на Светското првенство говореше за Египќанецот само во суперлативи.

„Салах е одличен играч. Тоа го покажа и во Рома и сега во Ливерпул. Тој се уште е млад и константно напредува. Не сакам да зборувам многу за играчи кои не играат во мојот тим, но тој е играч кој многу го ценам“, изјави Зидан.

Потсетуваме, фудбалерите на Реал Мадрид нешто подоцна во текот на денот го играат финалниот натпревар за Светското клупско првенство против Гремио.