Мегваер останува без капитенската лента

Како што стојат работите, Манчестер Јунајтед во новата сезона ќе има нов капитен.

Островските медиуми пренесуваат дека Ерик тен Хаг пред почетокот на подготовките дефинитивно одлучил англискиот репрезентативец Хари Мегваер да не ја носи лентата.

Клубот се обидува да го продаде стоперот, што оди доста тешко, а Мегваер вториот дел од минатата сезона го мина најмногу на клупата за резерви.

Се верува дека улогата на капитен ќе ја добие играчот од средниот ред Бруно Фернандеш, кој во изминатите месеци ја извршуваше оваа улога како замена.

Веста доаѓа по разделбата со голманот Давид де Хеа, со кој клубот не го продолжи договорот по 12 години соработка.

Јунајтед е во преговори со неколку голмани, но се верува дека замена за Шпанецот ќе биде Камерунецот Андре Онана, чуварот на мрежата на Интер.

Тој веќе бара стан во Манчестер додека двете страни преговараат за висината на трансферот.