Италијанците експресно го наградија Манчини за пласманот на ЕП

Селекторот на Италија, Роберто Манчини, денеска официјално го продолжи договорот со оваа репрезентација.

Манчини пристигна на клупата на Аѕурите пред квалификациите за ЕП, кое се игра следното лето. Пред него имаше многу работа со оглед на смената на генерации, но успеа да ги спои коцките и на три кола пред крајот го осигура пласманот на ЕП.

Италијанците во сабота во Рим ја победија Грција со 2:0 и така го осигураа своето место на ЕП следното лето, а челниците на Фудбалскиот сојуз на Италија го наградија Манчини за овие резултати.

Имено, денеска е објавено дека Манчини го продолжи договорот со Аѕурите и дека ќе биде на ова место до крајот на 2022. година. Со тоа, Манчини ќе ја предводи италијанската селекција на ЕП и квалификациите за Мундијалот.

Манчини ја препороди играта на Италија откако пред две години на шокантен начин оваа селекција не се пласира на СП. Во седум натпревари во овие квалификации Италија забележа седум победи.