Видео: Јокиќ и Леброн на чекор од трипл-дабл – драма во финишот каква што можеше да се посака!

Изминатата вечер во НБА лигата беа одиграни шест натпревари.

За вистинска драма и во финишот за местото кое води во плеј-офот се погрижи Денвер кој славеше над Минесота со 100:96, по што сега овие две екипи се израмнети на табелата.

Најефикасен во редовите на екипата од Колорадо беше Џамал Мареј со 22 поени. Сепак, клучен беше Никола Јокиќ кој беше на чекор од трипл-дабл. Иако промашуваше (од првите 13 обиди погоди само три) Србинот го имаше секаде на теренот. Јокиќ натпреварот го заврши со 16 поени, 14 скокови и девет асистенции, му недостасуваше само едно додавање за трипл-дабл.

Кај Минесота најефикасен и до дабл-дабл учинок стигна Карл Ентони Таунас (26 поени, 13 скокови).

Сега Денвер и Минесота се изедначени на табелата имаат по 44 победи во сезоната, ист број има и седмопласираниот Њу Орлеанс, но и натпревар помалку, а до крајот на регуларниот дел има само уште три натпревари. Од кои последната е меѓусебен дуел и тоа на теренот на Минесота на 12 април. Во меѓувреме Денвер гостува кај Клиперси и игра на домашен терен против Портланд, додека Минесота патува кај Лејкерси и има зицер со Мемфис пред своите гледачи. Споменатиот Њу Орлеанс го очекуваат дури три гостувања во низа (Феникс, Голден Стејт, Клиперси) и Сан Антонио на свој паркет.

Индијана славеше победа на свој паркет над шампионот Голден Стејт (126:106). Домаќинот беше предводен од Хрватот Бојан Богдановиќ кој беше и најефикасен на натпреварот.

Богдановиќ уфрли 28 поени, запиша две асистенции и три скока, неговиот соиграч Олдипо стигна до 21 поен, седум асистенции и шест скокови.

Во редовите на шампионот најрасполжен беше Кевин Дурант со 27 поени, седум асистенции и пет скокови, втор најефикасен играч кај Вориорси беше Томпсон со само 16 поени.

Леброн Џејмс во тесната победа на Кливленд над Вашингтон стигна до дабл-дабл, а само еден скок му недостасуваше да запиша и трипл-дабл учинок. „Кралот“ постигна 33 поени, подели 14 асистенции и запиша 9 скока.

НБА резултати:

Индијана – Голден Стејт 126:106

Кливленд – Вашингтон -119:115

Хјустон – Портланд 96:94

Милвоки – Бруклин 111:119

Јута – Лос Анџелес Клиперси 117:95

Денвер – Минесота 100:96