Во стилот на Ибрахимовиќ. Мексиканка постигна спектакуларен гол (Видео)

Во десеттото коло на мексиканскиот женски шампионат видовме погодок кој ќе биде еден од фаворитите за наградата Пушкаш.

Тигрес ја пречека Гвадалахара Чивас, а резултатот беше 0:0 до 76-та минута.

Тоа се промени по еден корнер за Тигрес, а она што го направи Лизбет Овале многу брзо го обиколи светот.

Корнерот беше лошо изведен, но топката се врати кај фудбалерките на Тигрес.

Џенифер Ермосо, фудбалерката која привлече внимание на светската јавност откако претседателот на шпанскиот сојуз Луис Рубиалес ја бакна по освојувањето на светското првенство, ја нафрли топката во петерацот, а потоа Овале го оправда својот прекар.

Дваесет и петгодишната Мексиканка, која ја нарекуваат “Магионичарка”, реши да шутира на начин на кој би помислил само Златан Ибрахимовиќ.

Таа се реши за “шкорпион”, односно удар со ѓон преку глава, а топката по високата парабола заврши директно во мрежата на гостите.

Овој навистина спектакуларен погодок вреди да се гледа од сите можни агли, а ќе видиме дали ќе биде прогласен за најубав и дали Овале ќе биде наградена со наградата Пушкаш.