Важна измена во европските клупски турнири

Дебитната сезона на Лигата на шампиони, Лига Европа и Лига на конференции во нивните нови формати со основна фаза со многу тимови и општо рангирање доведе до предлози за одредени корекции со цел да се направат турнирите уште поинтересни.

Една од нив веќе е факт, а се однесува на елиминацијската фаза. Поточно, за тоа кој тим ќе биде домаќин во реваншот.

Досега ова се одредуваше преку жреб, но од УЕФА одлучија веќе да нема жреб за ова, за да се даде поголема значајност на основната фаза. Отсега натаму, предноста да се биде домаќин во реваншот ќе се извојува во рамките на лигашката фаза, во која секој тим игра еднаш против различни противници.

Веќе првите два тима во крајното рангирање по завршувањето на основната фаза ќе имаат предност да ги играат реваншите дома во секој круг до финалето. Тимовите што ќе завршат на 3-то и 4-то место, ќе бидат домаќини во реваншите од осминафиналето и четвртфиналето. Тие што ќе завршат меѓу 5-то и 8-мо место, ќе го играат реваншот дома во осминафиналето.