Тео Хернандес го елиминира Милан, Феенорд во осминафинале

Милан е елиминиран од Лигата на шампиони од страна на Феенорд, откако во реваншот на „Сан Сиро“ натпреварот заврши 1:1, а претходно Феенорд имаше минимална победа дома во Ротердам.

„Росонерите“ имаа блескав старт на натпреварот, со погодок на Гименез веќе во првата минута. Милан доминираше во текот на првото полувреме, создавајќи одлични шанси и погодувајќи ја стативата, што ги донесе блиску до пласман во следната фаза.

На самиот крај од првото полувреме, Тео Хернандес доби жолт картон, а во 54-та минута, поради симулација, заработи и втор жолт, па го остави тимот на цедило.

Со играч помалку, Милан не успеа да одржи предност. Феенорд го искористи ова и постигна гол, израмнувајќи на 1:1, што беше доволно за нивно место во осминафиналето.