Сколс го предупредува Јунајтед за играч од 115 милиони евра: “Не сум сигурен дека ни е потребен”

Легендата на Манчестер Јунајтед Пол Сколс изрази сериозни сомнежи околу потенцијалниот трансфер на ѕвездата на Брајтон, Карлос Балеба. Тој го предупреди својот поранешен клуб дека играчот, проценет на 100 милиони фунти (околу 115 милиони евра), не е играчот кој им е потребен.

Скаутите на Јунајтед го следеа Балеба уште летово, но Брајтон ја поставија цената повисока од 100 милиони фунти. Последните извештаи потврдуваат дека камерунскиот играч за врска сѐ уште е на листата желби на тренерот Рубен Аморим за зајакнување на средниот ред.

Во разговор за Скај Спортс, Сколс даде детална анализа за квалитетите на Балеба. Иако ја пофали атлетската моќ на Балеба, споредувајќи го со стилот на Мојзес Каиседо од Челси, тој изрази загриженост за неговиот вкупен квалитет.

„Балеба е многу млад. Што се однесува до квалитетот, дали е тој навистина тука? Мислам дека е скоро во стилот на Каиседо. Одлично играше во Челси, не ме сфаќајте погрешно, но дали е тоа типот на играч кој Манчестер Јунајтед го бара? Не сум сигурен”, рече тој.

Карлос Балеба (21) веќе има собрано над 70 настапи во Премиер лигата откако пристигна во Брајтон од Лил за 23 милиони фунти. Оваа сезона настапи на сите 12 првенствени натпревари за неговиот тим, но само еднаш ги одигра сите 90 минути.