Сити подготвува статуа за Де Брујн, а поранешниот клуб веќе го повикува назад

Најавеното заминување на Кевин Де Брујне од Манчестер Сити на крајот од сезоната предизвика немир во инаку монотониот петок во англискиот фудбал, а една од информациите што се појави во врска со идните чекори на актуелниот шампион на Премиер лигата се однесува на гестот на благодарност кон белгискиот ас.

Како што пренесува „Дејли Мејл“, Сити планира да му се оддолжи на Де Брујне така што пред „Етихад“ ќе му изгради статуа, слично на тоа што направи кога од клубот заминаа Венсан Компани, Дејвид Силва и Серхио Агуеро.

По десетгодишниот престој во небесно синиот дел на Манчестер, јасно е дека некогашниот фудбалер на Генк и Волфсбург заслужи да се најде во групата со споменатите тројца играчи кои во овој век оставија длабок отпечаток на „Етихад“.

Паралелно со приказната за гестот на благодарност од Сити кон фудбалерот кој од 2015 година е член на клубот, се отвори прашањето за продолжување на кариерата на Белгиецот.

Договорот на Де Брујне со Сити истекува на 30 јуни, што е во екот на Светското клупско првенство, па се поставува големо прашање дали Гвардиола ќе смета на него во натпреварувањето кое започнува средината на шестиот месец.

Белгиецот ќе има право на настап во воведните три натпревари против Видад, Ал-Аин и Јувентус, додека последниот премиерлигашки дуел во дресот на Сити ќе го одигра на 25 мај на гостувањето кај Фулам во последното коло.

Кога станува збор за можниот нов клуб на Де Брујне, годините и стажот сугерираат на Саудиска Арабија или МЛС лигата, иако Волфсбург многу би сакал да го види во своите редови.

Dear Kevin, do you remember? You and I ten years ago? How about the two of us again? https://t.co/Q9mzOXI4MW

— VfL Wolfsburg (@VfL_Wolfsburg) April 4, 2025

Германскиот клуб на веста за заминувањето на Де Брујне од Сити го повика Белгиецот да го послуша срцето и да се врати во автомобилскиот град во Германија.

„Драг Кевине, се сеќаваш ли? Ти и ние пред 10 години. Како би изгледало да се соединиме повторно“, стои на профилот на Волфсбург на популарната мрежа „X“.

Фото: kevindebruyne/instagram