Реал утре ќе го претстави големиот аргентински талент

Реал Мадрид утре ќе го претстави едно од своите летни новитети, на кое вложува големи надежи.

Тоа е уште 17-годишниот аргентинец Франко Мастантуоно, за кого „кралевите“ платија на Ривер Плејт вкупно 63 милиони евра, и на тој начин тинејџерот стана најскапиот трансфер во целата историја на аргентинскиот фудбал.

Церемонијата ќе започне во 13 часот, а претходно претседателот Флорентино Перес ќе го прими аргентинецот за протоколарниот чин на потпишување на договорот, кој го врзува со кралскиот клуб за шест сезони. По претставувањето, аргентинецот ќе зборува пред медиумите.

Датумот не е случајно избран, бидејќи токму утре Мастантуоно го слави својот роденден и станува полнолетен. До сега тој немаше право да тренира со Реал Мадрид, иако пристигна во шпанската престолнина уште на 3 август.