Реал Мадрид почна преговори со Модриќ, но Хрватот го има последниот збор

Лука Модриќ има договор со Реал до 30 јуни оваа година. Ова значи дека од вчера може слободно директно да преговара со заинтересираните клубови околу трансферот летово. Освен што со потенцијалните тимови може да преговара без дозвола од клубот, што значи дека не мора да чека Реал да ја прифати понудата и отштетата за него, Модриќ на последниот ден од јуни може да го напушти Реал бесплатно, без отштета. Така е затоа што има уште само шест месеци од договорот со клубот чии капитен е.

„Реал ќе му дозволи на Лука Модриќ да одлучи што ќе направи понатаму. Доколку сака да остане, ќе му го продолжат договорот. Ако сака да оди во друг клуб или да се пензионира, ќе го поддржат во таа негова одлука“, објави „АС“.

Модриќ е во Реал од летото 2012. Од тогаш стана легенда на најголемиот клуб и со 28 пехари негов најтрофеен играч. Поради неговите години во последните неколку години договорот со Реал го продолжува на по една година. Модриќ така стигна до дури 39 години како играч на Реал и 560 натпревари за него. Кога ќе му заврши тековниот договор со тој клуб, до 40. роденден ќе му останат само 70 дена.

Модриќ повеќе пати изјавил дека му е желба да ја заврши кариерата во Реал. Таму ќе биде секако до крајот на оваа сезона, но се очекува и понатаму. Модриќ сака да игра фудбал до Светското првенство 2026, па му е потребна уште една сезона во професионален фудбал по ова за да го дочека шампионатот подготвен. Кога ќе се пензионира, може да остане во Реал. Шпанските медиуми повеќе пати пишуваа дека му се нуди работа во стручниот штаб затоа што е многу важен за атмосферата во тимот и во соблекувалната.