Реал Мадрид ќе бара отштета од УЕФА поради Суперлигата

Реал Мадрид најави дека ќе бара „значајно обештетување“ од Европската фудбалска унија (УЕФА) откако таа организација го изгуби жалбениот процес во врска со неуспешната Европска Суперлига.

Во средата, Окружниот суд во Мадрид ја потврди пресудата од мај 2024 година, со која беше утврдено дека УЕФА, Шпанската фудбалска федерација (РФЕФ) и Ла Лига применувале анти-конкурентни практики и ја злоупотребиле доминантната позиција со забраната за клубовите да учествуваат во Суперлигата.

УЕФА реагираше со соопштение во кое наведува дека најновата пресуда „не ја потврдува“ Суперлигата, „ниту ги подрива постојните правила на УЕФА“.

Реал Мадрид беше еден од 12 европски клубови кои ја поддржаа Суперлигата во 2021 година, пред проектот да пропадне поради притисок од владите и навивачите.

Во посебна одлука, Европскиот суд на правдата во декември 2023 година, пресуди дека забраната за клубовите да учествуваат во Европската Суперлига е незаконска, што ги натера УЕФА да ги ажурираат своите правила.

„Реал Мадрид ја поздравува одлуката на регионалниот суд во Мадрид да ги отфрли жалбите на УЕФА, RFEF и Ла Лига, потврдувајќи дека УЕФА, во случајот на Суперлигата, сериозно ги прекршила правилата за конкуренција на ЕУ, злопотребувајќи доминантна позиција, согласно пресудата на CJEU“, се вели во соопштението на 15-кратниот европски шампион.

„Оваа пресуда отвара пат клубот да бара значајно обештетување од УЕФА“, наведоа од клубот.

„Правилата обезбедуваат да се оценуваат меѓународните натпревари според објективни, транспарентни, недискриминаторски и пропорционални критериуми. Организацијата внимателно ќе ја разгледа пресудата пред да одлучи за следни чекори“, изјави УЕФА.

УЕФА нагласи дека ќе продолжи да го „чува единството на европскиот фудбал“ и дека останува „посветена на европскиот спортски модел, заснован на спортски заслуги, отворен пристап, солидарност и заштита на фудбалската пирамида“.

Ла Лига соопшти дека го почитува решението на Окружниот суд, но повторно ја нагласи „цврстата посветеност на интегритетот и стабилноста на националните натпревари“ и „почитувањето на правилата за конкуренција на ЕУ“.

Претседателот на Ла Лига Хавиер Тебас додаде: „Оваа пресуда ниту на кој начин не претставува поддршка за Суперлигата или било кој друг формат. Само уште еднаш нагласува дека правилата треба да се применуваат транспарентно и објективно.“

Сагата околу Европската Суперлига започна во април 2021 година, кога беше објавено дека 12 клуба потпишале учество во натпреварувањето.