Maкедонија освои голем бод со Белгија, но Милевски откри и од што не бил задоволен

Македонската фудбалска репрезентација се враќа со голем бод од Гент, откако успеа да остане непоразена против силната Белгија и да ги задржи шансите за пласман на Светското првенство, дури и како првопласирана во групата.

Селекторот Благоја Милевски изрази задоволство од дисциплината и играта во одбраната, но посочи дека организацијата на нападот не била на посакуваното ниво.

„Можам да бидам задоволен од тоа како изгледавме дефанзивно – функциониравме компактно, дисциплинирано и одговорно. Но, не смеам да бидам задоволен од организацијата на играта. Белгија има свој удел во тоа, но сепак очекувавме подобра реализација во транзицијата. И покрај тоа, резултатот е одличен и момците заслужуваат честитки. Најважно е што покажавме карактер и научивме како да се браниме квалитетно и кога не ни оди офанзивата. Сега фокусот е веќе на следниот натпревар во понеделник“, изјави Милевски.

Тој додаде дека идејата не била Македонија да се повлече и да се брани во текот на целиот меч, туку да се игра со поголем посед и контрола на топката, нешто што не успеа целосно да се реализира поради агресивниот пристап на Белгијците.

„Планот беше да имаме повеќе топка во нозете и подобра организација во средината, но противникот со својата агресивност и дуплирање на нашите креативни играчи не натера да се повлечеме. И покрај тоа, го извлековме максимумот од овој натпревар. Бевме ограничени офанзивно, но беспрекорни дефанзивно. Задоволен сум што остануваме во трка до самиот крај и што повторно покажавме дека Македонија знае да се бори со најдобрите“, истакна Милевски.