Лука Модриќ има нов план: Ќе го напушти Реал Мадрид, но ќе остане во Европа?

Судбината на Лука Модриќ во Реал Мадрид и натаму е под знак на прашање, а се повеќе извори наведуваат дека хрватскиот маестро би можел наскоро да донесе изненадувачка одлука и да остане во европскиот фудбал – но надвор од Мадрид.

На Модриќ договорот со Реал му истекува средината на јули, по завршувањето на Светското клупско првенство, и досега не е потврдено дали клубот ќе му понуди продолжување на соработката.

Иако во клубот е веќе повеќе од деценија и има статус на најтрофеен играч во историјата на Реал, го чека 40-тиот роденден и сериозно се разгледуваат промени во тимот.

Без оглед на годините, Модриќ и натаму покажува класа. На неодамнешниот натпревар против Мајорка блескаше и доби висока оценка од 8.6 според Sofascore – една од најдобрите оваа сезона.

Сепак, шпанските медиуми наведуваат дека тоа можеби нема да биде доволно да ги промени плановите на раководството на клубот. Фокусот на управата е на обновување на клучните позиции, вклучувајќи го и средниот ред, што потенцијално ги намалува шансите за негово останување.

Според тврдењата на шпанскиот новинар Ману Карењо, во игра се и други дестинации. Иако доби понуди од Саудиска Арабија и Соединетите Држави, Модриќ наводно не е заинтересиран за тие опции.

Наместо тоа, сака да остане во Европа, а како можна нова дестинација се спомнува Италија – поточно, клуб од Серија А.

Конечната одлука може да зависи и од новиот тренер на Реал, веројатно тоа ќе биде Чаби Алонсо, поранешен соиграч на Модриќ.

Целта на Модриќ е јасна – да игра на Светското првенство 2026 година и таму да ја заврши репрезентативната кариера. Токму затоа му е важно да остане во врвно европско натпреварување за да ја задржи својата форма и да конкурира за повик од селекторот Златко Далиќ.