Луис Хамилтон ќе ја напушти Формула 1 на крајот од сезоната?

“Во светот на Формула 1, вредиш колку што вреди твојата последна трка”, е позната изјава од Аиртон Сена во 80-тите години. Ова изгледа како да се одразува на случајот со Луис Хамилтон, кој е во слободен пад веќе 12 трки, почнувајќи од победата на спринтот во Кина. Неговата изјава од минатата сабота, “бесполезен сум и Ферари треба да најде друг возач”, направи голем немир и вознемиреност меѓу британските спортски новинари, пишува Maркa.

“Не гледам дека ќе истрае”

Меѓу многуте коментари се издвојува оној од познатиот коментатор од Скај Спорт, Мартин Брандл. “Не можам да го гледам како продолжува уште две сезони во Ферари или на кое било друго место, ако продолжи вака”, нагласи Брандл.

“Летната пауза е совршено време за Луис да се врати обратно. Болно е да се гледа оваа легенда среде толку многу проблеми и треба да се надеваме дека ќе успее да го преброди бурното време и да ја врати својата форма, имајќи предвид неговиот талент и искуство”, додаде тој, иако не е целосно оптимистичен.

“Изгледа депресивно”

“Јасно е дека се наоѓа во тешка лична ситуација, а за време на трката пак заврши на истото 12-то место, без знаци на напредок”, објасни Брандл.

Брандл се осврна и на инцидентот со Макс Верстапен, потсетувајќи дека Хамилтон не сакал да се појави пред судиите. “Тој одби да присуствува на состанокот со судиите поради прилично амбициозен маневар кој го направи Верстапен за време на трката, при кој Луис реши да ја напушти патеката за да избегне контакт”, рече тој.

“Не сакаше да го оспори инцидентот и го прифати преку својот тим, но Макс дојде на состанокот со рационално објаснување од своја страна и избега од казна”, додаде поранешниот возач на Вилијамс и Мекларен.