Италијанскиот селектор со совет до Рома: Него морате да го задржите!

Селекторот на фудбалската репрезентација на Италија Лучано Спалети изјави дека Рома треба да го задржи напаѓачот Пауло Дибала, пренесоа денес италијанските медиуми.

Рома во неделата ја совлада Парма со 5:0 во првенството, а Дибала беше двоен стрелец.

Тој летово беше на чекор од заминување од Олимпико и премин во еден од саудиските клубови, но се предомисли и остана во Италија, но се шпекулира дека би можел да ја напушти Рома.

“Дибала, како што сите знаат, е играч што може да ја направи целата екипа да игра подобро. Има техника, способност да се поврзе со тимот и квалитет секогаш кога ќе добие топка. Има самодоверба пред голот. Само му треба малку повеќе физичка сила, но е играч од прва класа”, изјави Спалети за Ла Доменика Спортива, пренесе TMW.

Некогашниот тренер на Рома оцени дека е важно да се задржи 31-годишниот Аргентинец во клубот. “Не е на мене да кажам дали Рома треба да го задржи. Знам дека Дибала е силен играч, а за екипа што сака да изгради силен менталитет, важно е да задржи играчи како него”, наведе Спалети.

Дибала оваа сезона одигра 14 натпревари во Серија А и постигна четири гола, а на два меча одигра по 90 минути, откако Клаудио Раниери ја презеде екипата.

Раниери рече дека е сигурен дека Дибала е среќен во Рома. Некои медиуми пренесоа дека Дибала е на чекор од останување, бидејќи според постоечката клаузула, неговиот договор може автоматски да биде продолжен на уште една година.