Испишана фудбалска историја: Прв клуб кој освоил две лиги во иста година

Фудбалскиот клуб Ал Хилал Омдурман од Судан, познат како еден од најуспешните клубови во североисточна Африка, направи револуционерно достигнување во фудбалската историја. Во сезоната 2024/25, тие успеаја да триумфираат во две национални лиги – во две различни држави.

Поради воените конфликти кои ја зафатија Судан, Ал Хилал привремено се пресели во Мавританија, каде што учествуваше во локалната национална лига. Иако формално беа “гости”, тие доминираа на теренот како вистински домаќини – за време на 30 натпревари, собраа 67 поени, што им беше доволно за да ја освојат шампионската титула во мај.

Враќање дома – и нов трофеј

Со стабилизацијата на состојбите, Ал Хилал се врати во својата земја и се приклучи на завршните натпревари од суданската Премиер лига. Во конкуренција со осумте најдобри екипи, одиграа седум натпревари, а во последното коло во директна пресметка за титулата го совладаа големиот ривал Ал-Мереик и така ја освоија и суданската шампионска титула.

Уникатен случај во фудбалската историја

Според сите достапни податоци, ова е прв случај во историјата еден клуб во иста сезона да освои две различни национални лиги. Додека многу приказни од земји погодени од војна се тажни и трагични, оваа фудбалска авантура од Судан носи зрак надеж и инспирација – како спортот во најтешките времиња може да понуди нешто позитивно.