ФА Куп: Челзи „пукна“ петарда, екс-клубот на Вејн Руни приреди сензација!

Денес попладне се одиграа дури девет натпревари од 3. коло на ФА купот, а понатаму продолжија – Челзи, Борнмут, Лестер, Брајтон, Нотингам Форест, а најголемата сензација ја приреди Плимут кој како гостин го елиминираше Брентфорд!

Фудбалерите на Челзи рутински го победија Моркам резултатски со 5:0.

Енцо Мареска очекувано даде шанса на играчите кои не добиваат минутажа во Премиер лигата. Во 17. минута Кристофер Енкунку промаши пенал, но тоа не им пречеше на „сините“.

Во 39. минута Адарабојо погоди после асистенција на Рис Џејмс за 1:0.

Во 50. минута Енкунку се оправда за промашениот пенал, откако со повратна на Кукурела погоди за 2:0.

Во 70. минута Адарабојо постигна еврол гол, со одличен удар од далечина за 3:0.

Во 75. минута на листата на стрелци се запиша и Жоао Феликс, откако од некои 20 метра погоди за 4:0.

Феликс брзо постигна и втор гол, уште поубав, откако шутираше од лева страна и погоди во подалечниот агол за 5:0.

Нотингам Форест продолжи да реди одлични резултати оваа сезона, откако како домаќин го победи Лутон – 2:0.

Најголемото изненадување го приреди Плимут, најлошиот тим во Чемпионшип кој неодамна го отпушти Вејн Руни, кој како гостин го елиминираше Брентфорд – 0:1!

Томас Франк очекувано ротираше, даде шанса на вториот тим, но тоа им се одрази на домаќините. Во продолжението внесе Мбуемо и Виса, но тоа не донесе голови.

Во 82. минута гостите го шокираа Брентфорд, Витакер постигна, а гостинските навивачи полудеа на својата трибина.

Плимут до крајот ја зачува предноста и се пласира во наредната рунда, а верувале или не, овој тим од средината на октомври забележа само една победа и затоа ова е најголемата сензација и воедно целата убавина на ФА купот.

Што се однесува до останатите натпревари, Борнмут, Брајтон и Лестер рутински ги оправдаа улогите на фаворити.

Борнмут како домаќин го надигра ВБА – 5:1, Лестер го разнесе КПР – 6:2, додека Брајтон како гостин го победи Норич – 0:4, а овој натпревар го обележа повратничкиот гол на Соли Марч по тешка повреда и долга пауза.