Диего Коста: Конте во Челси никој не го сакаше

Диего Коста зборуваше за своите искуства со поранешниот менаџер на Челси, Антонио Конте, потенцирајќи дека актуелниот тренер на Наполи „никому не му беше омилен“ за време на неговиот мандат на Стамфорд Бриџ.

Коста, поранешен репрезентативец на Шпанија, помина три сезони во лондонскиот клуб, од кои последната, 2016/17, беше под водство на италијанскиот тренер, кога го освоија насловот од Премиер лигата. Иако имаа заеднички успеси, нивниот однос се заостри и Коста се врати во поранешниот клуб Атлетико Мадрид, пишува Goal.

Коста се докажа и во Челси на две сезони пред доаѓањето на Конте, кога го освои својот прв англиски наслов под водство на Жозе Мурињо. По слаба следна сезона, кога тимот заврши на десетто место, Мурињо беше отпуштен.

Со доаѓањето на Конте летото 2016 година и воведувањето на неговата тактичка формација, Челси оствари 13 последователни победи и се етаблираше како најголем кандидат за титулата. Сезона 2016/17 ја завршија на прво место, со седум поени пред второпласираниот Тотнхем.

Како напаѓач, Коста беше клучен играч во таа сезона со 20 постигнати голови. Но и покрај спортските успеси, односот со Конте остана напнат и Коста се врати во Атлетико во зимскиот трансфер период 2018 година.

До отворен конфликт дојде во јануари 2017, кога Коста беше изоставен од тимот за натпреварот против Лестер поради наводна расправија со фитнес тренерот, што ескалираше во конфликт со Конте. Во исто време, Коста доби понуда од кинески клуб со годишна плата од 30 милиони фунти. Конте, наводно, му рекол: „Оди во Кина“.

Трансферот не се реализираше тогаш и Коста беше вратен во првиот тим, придонесувајќи во освојувањето на титулата. Сепак, по крајот на сезоната, Конте им испрати пораки на играчите за добредојдено лето, додека на Коста му напиша во дополнителна порака:

“Здраво Диего, се надевам дека си добро. Ти благодарам за сезоната која ја поминавме заедно. Среќно следната година, но не си во моите планови.” Следеше летен трансфер пазар кој заврши со враќањето на Коста во Атлетико Мадрид, каде доби право на настап во јануари 2018 поради казната за трансфери од страна на ФИФА за шпанскиот клуб.

Во најавата за новата епизода на подкастот на Џон Оби Микел, Коста ги откри контроверзите, тврдејќи дека и неговите соиграчи не биле задоволни со работата под италијанскиот тренер. „Тој е личност која не им верува на другите.

Мисли дека знае сè. Не се радуваш на тренинг со него, секогаш е лут, секогаш со намрштен израз. Играчите сакаа да се вратат, но никој не го сакаше и затоа не траеше долго. Минатото е минато“, изјави Коста. Тој го спореди Конте со друг тренер со кој работел во Челси: „За мене, Мурињо, лично, беше тренерот во кој најмногу уживав. Тоа беше затоа што ти го дава животот. Среќен си кога одиш на тренинг.“

За време на својот втор период во Атлетико, Коста постигна 19 голови во 81 настап и учествуваше во освојувањето на титулата шампион на Шпанија 2020/21 година, иако му беше раскинат договорот во декември таа сезона. Со Атлетико освои и Лига Европа и УЕФА Суперкуп. Подоцна играше за бразилските клубови Атлетико Минеио, Ботафого и Гремио, како и за англискиот Вулверхемптон. Договорот со Гремио му истече во 2024 година, но 37-годишниот напаѓач сè уште официјално нема престанато.

Антонио Конте во овој момент е на чело на Наполи. Неговиот тим во вторникот одигра 1:1 против Копенхаген во Лигата на шампионите. Тој резултат го опиша средишниот играч Скот Мектоминај како „неприфатлив“, а клубот од Серија А сега е во опасност да ја пропушти нокаут фазата на натпреварувањето.