Детали од новиот договор на Ван Дајк: Стана најплатениот дефанзивец во Европа

Вирџил Ван Дајк ја продолжи верноста кон „црвените“ за дополнителни две години, што го направи исклучително среќен и горд.

“Многу сум среќен и горд. Многу емоции ми минуваат низ главата кога зборувам за Ливерпул. Неверојатно е чувството да го продолжам договорот со клубот за уште две години. Многу сум среќен. Во мојата глава секогаш беше само Ливерпул и ниту еден друг клуб освен него”, рече Ван Дајк.

Според угледниот Дејвид Орнстајн, Ван Дајк ќе заработува 460 илјади евра неделно според новиот договор и ќе биде најплатениот дефанзивец во Европа.

Ван Дајк дојде во Ливерпул во зима 2018 година од Саутемптон и многу брзо се етаблира како еден од најдобрите дефанзивни играчи во Европа.

Во дресот на Ливерпул одигра 314 натпревари и постигна 27 погодоци. Се закити со титули во Премиершип, Лигата на шампионите, Светското клупско првенство, Суперкупот на Европа, ФА Купот и два Лига купа.

На индивидуално ниво, беше избран за играч на годината во Англија во 2019 година и четири пати беше избран во идеалниот тим на англиската Премиерлига.

Овој 33-годишник, исто така, во 2019 година беше втор во изборот за Златна топка зад Лео Меси.

Фото: Liverpool FC