Деко се огласи за иднината на Нејмар!

Иднината на бразилската фудбалска ѕвезда Нејмар привлекува големо внимание кај љубителите на најпопуларниот спорт веќе неколку недели наназад, а шпекулациите за неговиот следен клуб отидоа толку далеку што се појавија информации за враќање во Барселона.

Поранешната ѕвезда на каталонскиот клуб е под договор со Ал Хилал до 30 јуни, но бидејќи не е регистриран за вториот дел од сезоната во Саудиска Арабија, повеќе од извесно е дека веќе оваа зима ќе го напушти Ријад.

Илузиите на навивачите дека по речиси осум години би можел повторно на “Камп Ноу” брзо се распрснаа, бидејќи спортскиот директор на Барселона, Деко, порача дека зделката во овој момент е далеку од реализација.

“Враќањето на Нејмар во Барселона е на километри оддалечено во овој момент. Од поаѓањето во Саудиска Арабија сме запознаени со неговата пазарна вредност, особено во услови на финансиски фер-плеј”, потсети Деко во изјавата за каталонскиот Спорт.

Тој додаде дека Нејмар ќе биде и остане еден од најдобрите играчи во светот, но дека во овој момент враќањето во Бразил е многу полесно изводлив сценарио.

“Добредојден е во било кој клуб во светот. Договор со него никогаш не е исклучен, но во овој момент го гледам во Бразил”, заклучи поранешниот португалски фудбалер со бразилско потекло.