Барселона објави колку ќе паузира Олмо: Ова се натпреварите кои ќе ги пропушти

Повредата на адукторот на десната нога ќе го отстрани Дани Олмо од фудбалските терени за три недели, потврди Барселона. Да потсетиме, шпанскиот репрезентативец се повреди во натпреварот против Осасуна во 27. минута, четири минути откако постигна погодок за два гола разлика во победата на Барса со 3:0.

Ова е лоша вест за Барселона која се бори за три трофеи. Играчот кој порасна во нејзината академија, а играчкото искуство го стекна во загребскиот Динамо, Барселона го врати минатото лето во трансфер вреден 55 милиони евра од РБ Лајпциг. Олмо во последните четири сезони поради разни повреди вкупно пропушти дури 75 натпревари. Во оваа сезона, откако се врати во Барселона, изостави 13. Сега таа бројка ќе се зголеми.

Во следните три недели Барселона игра двапати против Борусија Дортмунд во Лигата на шампионите, против Атлетико во Купот на кралот и против Џирона, Бетис и Леганес во првенството. Олмо оваа сезона одигра 28 натпревари за Барса. Постигна осум гола и имаше пет асистенции.