Антони го одбил Баерн на последниот ден од трансферниот прозорец

Бразилското крило Антони откри дека бил во контакт со Баерн Минхен малку пред да го финализира трансферот во Бетис летово.

Бразилецот ја помина втората половина од минатата сезона на позајмица на “Бенито Виљямарин”, каде што постигна 9 голови во 26 натпревари во сите турнири. Летово тој реализираше постојан трансфер во шпанскиот клуб, откако беше отстранет од составот на Манчестер Јунајтед заедно со играчи како Маркус Рашфорд и Алехандро Гарначо.

Крилото сподели дека се чувствувал „непочитуван“ од “црвените ѓаволи” кон крајот на неговиот престој на „Олд Трафорд“ и беше видливо вознемирен додека зборуваше за времето поминато во Англија. Сега, додека продолжува да воодушевува во Ла Лига, тој откри пред “Глобо” дека бил многу близу до преминување во Баерн Минхен.

„Трансферниот прозорец затвораше наредниот ден, околу седум или осум навечер, ако не се лажам, или можеби на полноќ. Беше навистина последниот ден кога преговаравме со Бетис, и токму тогаш дојде повикот од Баерн“, раскажува Антони.