Анчелоти: Разбирам зошто Крос го напушти фудбалот

Реал Мадрид по седум кола во Лигата на шампионите има 12 бода, а вечерва патува за Франција на гостувањето кај Брест кој има еден повеќе. Со победа, мадридскиот тим сепак може да ја заврши оваа фаза од натпреварувањето меѓу осумте најдобри и директно да се пласира во осминафиналето, но за да се случи тоа ќе треба да се совпаднат низа резултати.

Ќе се фокусираме на играта со цел да победиме, ништо повеќе. Потоа ќе видиме што ќе се случи на ждрепката“, изјави тренерот Карло Анчелоти во најавата за натпреварот, кој се осврна на сопствената иднина во Реал.

“Клубот и јас сакаме да останеме заедно што е можно подолго. Ако се случи нешто необично, може да има промени. Тоа се случува често во фудбалот, но ние добро соработуваме. Клубот има доверба во мојата работа и јас имам доверба во што го правам.“, изјави Анчелоти и додаде:

“Нашата форма е се подобра. Сè уште не сме најдобри, но се приближуваме. Се подобривме како тим, како колектив, но тие исто така играа индивидуално добро и придонесоа многу, особено Мбапе. Му требаше време е да се прилагоди, но сега му оди многу добро.“

„Винисиус? Би го разбрал, разбрав и зошто Крос си замина“

Анчелоти не заборави да ги пофали Родриго, Белингем и Винисиус, а потоа го прокоментира интересот од Саудиска Арабија за вториот, за кого Ал Ахли наводно на Реал ќе му понуди рекордни 300 милиони евра обештетување, а на играчот петгодишен договор во вредност од околу една милијарда евра.

„Разбирам сè кога е во прашање фудбалот. Разбрав и зошто Тони Крос се пензионираше, а тоа не можат многу луѓе да го кажат. Овие одлуки се индивидуални, но како што кажав претходно, можам да видам дека е среќен и сака да остане тука и мислам дека ќе избере славата“, додаде Анчелоти.