Проблеми за Инфантино, една земја му ја повлече поддршка!

Ирската фудбалска федерација изненадувачки ја повлече поддршката за Џани Инфантино во неговата кандидатура за нов мандат на чело на ФИФА. Одборот на директори на федерацијата ја донесе оваа одлука по состанок на кој ја анулираше испратената писмена поддршка од почетокот на годината, известувајќи ја ФИФА за причините зад тој чекор.

Инфантино неодамна упати извинување поради контроверзниот предлог за формирање на компанија “FIFA Forward Enterprise”, на која ѝ беше наменета улогата да управува со комерцијалните и оперативни активности на турнирите на ФИФА. Планот вклучуваше продажба на 20 проценти од уделот на Светските првенства на приватни инвеститори. Сепак, и покрај извинувањето, Инфантино е сѐ уште под силен притисок да се откаже од својата функција.

Во официјалното соопштение, Ирска изразува благодарност за поддршката што ја добива ирскиот фудбал од страна на ФИФА, но исто така истакнува дека скорешните настани предизвикаа сериозна загриженост за управувањето, транспарентноста и недостигот на конкретни консултации.

„Имајќи предвид предизвиците во управувањето со кои се соочувавме во изминатите години, федерацијата има посебна обврска да се залага и да поддржува најдобри практики,“ беше додадено од страна на ирскиот сојуз.

Барањето за заминување на Инфантино беше искажано и од страна на УЕФА, АФЦ и КОНКАКАФ, главно поради неуспешниот обид за вклучување на приватен капитал во натпреварите на ФИФА. УЕФА претходно се закани со бојкот и веднаш започна прелиминарни разговори со АФЦ и КОНКАКАФ за организирање на сопствени турнири со цел да осигури квалитетни натпревари за играчите од нивните конфедерации.

Од друга страна, Инфантино доби поддршка од Катар, Либан, Мароко, Судан, Египет и Мавританија. Четири од овие шест земји исто така се членки на Советот на ФИФА. „Многу ја цениме постојаната заложба на господин Инфантино во промоцијата на фудбалот на глобално ниво, создавањето можности во сите региони и засилување на улогата на фудбалот како врска меѓу луѓето и заедниците,“ се наведува во нивното заедничко соопштение.