Ѓоковиќ едвај ја оправда фаворитската улога во Мајами

Српскиот тенисер Новак Ѓоковиќ обезбеди место помеѓу најдобрите 16 на турнирот во Мајами.

Ѓоковиќ потешко од очекувањата го победи 83-тиот тенисер на АТП листата, Федерико Далбонис од Аргентина со 2:1 во сетови (7:5, 4:6, 6:1).

Новак играше променливо во овој меч и кај него можеа да се забележат падови во играта. При резултат 5:2 во првиот сет тој му дозволи на Далбонис да стигне до 5:5, но на крај сепак го освои со 7:5.

Аргентинецот одлично одигра во вториот сет кој го доби со 6:4. Меѓутоа Ѓоковиќ се врати во третиот сет кој го одигра на највисоко ниво, го доби со 6:1 и не дозволи никакви изненадувања.

Во продолжение на турнирот во Мајами Новак го очекува меч со Роберто Баутиста Агут.