Тешки денови пред Интер: Клубот бара од играчите да се откажат од платите

Интер после повеќе од една деценија ја освои шампионската титула, но финансиската ситуација во клубот е катастрофална.

„Нероаѕурите“ во текот на целата година имаа проблем со исплаќање на платите, а сега од раководството на клубот потврдија дека ситуацијата е критична.

Генералниот директор Бепе Марота истакна дека наскоро ќе има средби со играчите и ќе побара од нив финансиски одрекувања за да може клубот да се спаси од банкрот.

Италијанските медиуми открија дека Интер ќе бара од играчите да се откажат од тримесечни плати од оваа сезона кои не му се исплатени, па така клубот ќе заштеди повеќе од 30 милиони евра.

Другата опција е да се ревидираат договорите така што платата на фудбалерите да се намали за одеден процент. Наводно играчите не се согласуваат со ваквите предлози.

Се погласни се шпекулациите дека тренерот Антонио Конте ќе си замине по завршување на сезоната, а неколку од ѕвездите би можеле да заминат со него.