Официјално: Поранешниот помошник во Челзи ќе води клуб во Серија А

Поранешниот помошник тренер на Челзи, Лука Готи, денеска беше назначен за нов тренер на Лече, два дена откако клубот го отпушти Роберто Д’Аверса поради удирање противнички играч.

Готи беше помошник на Маурицио Сари во Челзи во сезоната 2018/19, а беше и прв тренер во Удинезе и Специја.

Лече објави дека Готи потпишал договор до крајот на сезоната, со опција за продолжување на соработката доколку тимот обезбеди опстанок во Серија А.

Во неделата Лече загуби од Верона со 0:1, а по натпреварот Д’Аверса почна да интервенира во пресметката меѓу напаѓачот на Верона, Томаш Анри и дефанзивецот на Лече, Марин Понграчиќ. Наместо да ја смири ситуацијата, тој со глава го удри Анри пред судијата.

Покрај отказот, Д’Аверса доби суспензија од четири натпревари која ќе мора да ја одлежи кога ќе биде потпишан од друг клуб.

Лече се наоѓа на 16. место на табелата во Серија А и само еден бод го дели од зоната за испаѓање.

Новиот тренер ќе дебитира во сабота, кога Лече ќе биде домаќин на последнопласираната Салернитана.