Мудар потег на Јуве и мала тајна клазула во договорот на Роналдо

Кристијано Роналдо вчера ги постигна првите голови за Јувентус во Серија А.

Португалецот не се запиша во листата на стрелци на првите три натпревари, но синоќа ги постигна двата гола за победа на Јувентус над Сасуоло (2:1).

Тоа се првите погодоци на Роналдо во официјалните натпревари за новиот клуб во кој летоска стигна за 117 милиони евра од Реал Мадрид. А, погодоците кои ги постигнува можат да му донесат дополнителен профит.

Имено, италијанските медиуми откриваат дека Роналдо покрај платата од 30 милиони годишно има и клазула во договорот по која ќе заработи дополнителни пет милиони евра бонус ако на крајот од сезоната биде на просекот од еден погодок по натпревар.

Токму тоа би можело да биде дополнителен мотив за Роналдо да ги изрешета противничките мрежи, а вчера најави дека е спремен иако многумина се сомневаа во него, тврдејќи дека “поинаку се игра во Италија за разлика од Шпанија.“