Конте: Скудетото го посветувам на самиот себе

Интер после 10 години ја прекина доминацијата на Јувентус во Серија А и стигна до Скудетото.

Еден од најзаслужните што Интер го оствари овој успех е тренерот на „нероаѕурите“, Антонио Конте.

Италијанскиот стратег одлично го водеше Интер во текот на сезоната, а сега наводно бара од управата да му обезбедат тим кој ќе биде конкурентен во Европа.

Во последното коло Интер вчера го разби Удинезе со убедливи 5:1.

„Мислам дека ова беше убава завршница на една фантастична година. Игравме одлично, никој не се штедеше. Да се видат навивачи, па и во ваква ограничена бројка е прекрасно. Многу сме среќни што им дадовме на навивачите нешто прекрасно кое го чекаа долго време“.

„Дефинитивно на ова гледам како посебно остварување. Не беше лесно. Си ставив голем притисок на себе кога дојдов во клубот. Последните девет години се гледаше само Јувентус. Скудетото го посветувам на самиот себе затоа што знам колку ми беше тешко во овие две години и верувам дека го заслужив“, изјави Конте.