Драма каква што ретко се гледа: Ирак водеше до 95-та минута, па доживеа елиминација од Јордан!

Фудбалерите на Јордан на неверојатен начин се пласираа во четвртфиналето од Купот на Азија во Катар.

Во осминафиналето во Доха Јордан славеше со 3:2 против Ирак и тоа со пресврт кој го режираа со два гола во судиското продолжение.

Ирак одигра одлична групна фаза и ја победи дури и Јапонија која е прв фаворит за освојување на турнирот, па така направи изненадување во костурот поради што се случи и да гледаме големо дерби помеѓу Саудиска Арабија и Јужна Кореја уште во осминафиналето.

По таква групна фаза се очекуваше Ирак да дојде најмалку до четвртфиналето, но паднаа на првата препрека во нокаут фазата и тоа во натпреварот со селекцијата која тука се пласираше како една од четирите најдобри третопласирани во групите.

Јордан поведе во финишот од првото полувреме, Ирак со головите во 68-та и 76-та минута направи комплетен пресврт. Кога се мислеше дека се е готово Јордан со два гола во 95-та и во 97-та приреди големо изненадување.

За место во полуфиналето тие ќе се борат против дебитантот Таџикистан кој вчера славеше против ОАЕ.